RASMIY MUNOSABAT

Ijtimoiy tarmoqlarda “SHOVOTLIK TADBIRKOR AYBI NIMADA?” sarlavhasi ostida xabar tarqaldi.

Unda tadbirkorning tuman yo‘llardan foydalanish unitar korxonasi bilan tuzilgan shartnomasi bo‘la turib savdo shaxobchasi asossiz noqonuniy qurilma sifatida buzilganligi keltiriladi.

Ammo Kadastr agentligi tuman bo‘limi shartnomani haqiqiy emas deb topib, fuqarolik ishlari bo‘yicha Shovot tumanlararo sudiga daʼvo arizasi kiritadi. Sud tomonidan da’vo qanoatlantiriladi va qarorda fuqaro D.Matyakubova yer maydonini oldingi holatiga qaytarishi belgilangan.

Keyinchalik sud ishi Xorazm viloyat fuqarolik ishlari bo‘yicha sudi va Respublika Oliy sudlarida ham qayta ko‘rilib, dastlabki sud qarori o‘zgarishsiz qoldiriladi.

Tadbirkorning ishonchli vakili Qahramon Matyakubov sud qarori ijrosini taʼminlash o‘rniga mana 3 yildirki faoliyatini davom ettirib kelmoqda.

Bundan tashqari o‘z taxmin va shubhalariga asoslanib, tarmoqlarda muntazam video murojaat yo‘llamoqda.

Shu o‘rinda yolg‘on axborot tarqatish hamda davlat xodimini obro‘sizlantirish javobgarlikka sabab bo‘lishini eslatib o‘tamiz.