RASMIY MUNOSABAT
Joriy yilning 30-noyabr kuni ijtimoiy tarmoqlarda “Shovot 23-sonli maktabning sport zali qulaydi” sarlavha ostida videolavha tarqatildi. Videolavhada Shovot tumanidagi 23-sonli umumiy o‘rta ta’lim maktabining sport zali foydalanishga yaroqsiz ahvolda ekanligi keltirilgan.
Mazkur holat yuzasidan Xorazm viloyati xalq ta’limi boshqarmasi quyidagilarni ma’lum qiladi:
Shovot tumani, Xitoy mahallasida joylashgan 23-sonli umumiy o‘rta ta’lim maktabi 1974-yilda 536 o‘quvchi o‘rniga mo‘ljallab qurilgan bo‘lib, bugungi kunda 841 nafar o‘quvchiga 73 nafar pedagog xodimlar ta’lim-tarbiya berib kelmoqda.
Maktab 2007-yilda mukammal ta’mirdan chiqarilgan. Maktabning sport zali 2015-yilda foydalanishga yaroqsiz deb topilgan. Sport zalni qayta rekonstruksiya qilish maqsadida 2022-yil Investitsiya dasturiga kiritilishida amaliy yordam so‘rab yuqori turuvchi tashkilotlarga murojaat qilingan.
Xorazm viloyati umumta’lim maktablarini 2022-2026-yillarda qurish, rekonstruksiya va mukammal ta’mirlash bo‘yicha manzilli dastur shakllantirilmoqda. Ushbu dastur doirasida Shovot tumani 23-son umumiy o‘rta ta’lim maktabi sport zalini rekonstruksiya qilish bo‘yicha taklif kiritilishini ma’lum qilamiz.
Xorazm viloyati xalq ta’limi boshqarmasi Axborot xizmati